ភ្នំពេញ: អនុគណៈកម្មការស្រាវជ្រាវជំងឺកូវីដ-១៩ នៅថ្ងៃទី១៤ ខែកក្កដា ឆ្នាំ២០២១ បានចេញប្រកាសមានកម្រិតហានិភ័យចំពោះទីតាំងចំនួន៥រួមមាន៖
១, ហាង S Liquor សាខាទួលទំពូង ដែលមានទីតាំងស្ថិតនៅផ្លូវលេខ៤៣២ សង្កាត់បឹងត្របែក ខណ្ឌចំការមន នៅថ្ងៃទី៧ ខែកក្កដា ឆ្នាំ២០២១ វេលាម៉ោង៨៖៥០ ដល់ម៉ោង៩៖០៥ មូលហេតុអ្នកជំងឺកូវីដ-១៩ បានចូលទៅទិញគ្រឿងស្រវឹងនៅទីតាំងខាងលើនេះ។
២, ធនាគារ អ៊ីអន (AEON Specialize Bank) សាខាបូគោ ដែលមានទីតាំងស្ថិតនៅផ្លូវព្រះមុន្នីវង្ស សង្កាត់បឹងកេង៣ ខណ្ឌបឹងកេងកង ចាប់ពីថ្ងៃទី១ ដល់ថ្ងៃទី៦ ខែកក្កដា ឆ្នាំ២០២១ មូលហេតុអ្នកជំងឺកូវីដ-១៩ គឺជាបុគ្គលិកធ្វើការនៅទីតាំងខាងលើនេះ។
៣, បន្ទប់ថែទាំវេជ្ជសាស្ត្រ គ្រូពេទ្យ ស៊ាង ហៃ ដែលមានទីតាំងស្ថិតនៅតាមបណ្តោយផ្លូវវេងស្រេង សង្កាត់ចោមចៅទី១ ខណ្ឌពោធិ៍សែនជ័យ នៅថ្ងៃទី៦ និងថ្ងៃទី៧ ខែកក្កដា ឆ្នាំ២០២១ មូលហេតុអ្នកជំងឺកូវីដ-១៩ រួមជាមួយប្អូន២នាក់ទៀតបានជូនម្ដាយមកចាក់ថ្នាំនៅទីតាំងខាងលើនេះ។ ពេលនេះម្ដាយ និងប្អូនម្នាក់ក៏បានធ្វើតេស្ដវិជ្ជមានកូវីដ-១៩។ គ្រូពេទ្យ ស៊ាង ហៃ ដែលជាម្ចាស់គ្លីនិកនេះពុំគោរពតាមវិធានសុខាភិបាលឡើយ។
៤, ធនាគារ ABA សាខាទឹកថ្លា ដែលមានទីតាំងស្ថិតនៅអាគារ A39-A45 ផ្លូវសហព័ន្ធរុស្សី សង្កាត់ទឹកថ្លា ខណ្ឌសែនសុខ នៅថ្ងៃទី០៤ ខែកក្កដា ឆ្នាំ២០២១ ចាប់ពីម៉ោង១៤៖៥០ ដល់១៧៖០៥ មូលហេតុអ្នកជំងឺ កូវីដ-១៩ មានគ្នា២នាក់បានចូលទៅប្រើប្រាស់សេវានៅទីតាំងខាងលើនេះ។
៥, ក្រុមហ៊ុនមិត្តហ្វូន (Metfone) សាខាម៉ៅសេទុង ដែលមានទីតាំងស្ថិតនៅនៅផ្លូវម៉ៅសេទុង សង្កាត់ទួលស្វាយព្រៃ២ ខណ្ឌបឹងកេងកង ចាប់ពីថ្ងៃទី២៩ ខែមិថុនា ដល់ថ្ងៃទី៥ ខែកក្កដា ឆ្នាំ២០២១ មូលហេតុអ្នកជំងឺ កូវីដ១៩ គឺជាបុគ្គលិកធ្វើការនៅទីតាំងខាងលើនេះ។ ទីតាំងខាងលើនេះមានអ្នកវិជ្ជមានកូវីដ-១៩ ចំនួន៤នាក់។
អនុគណៈកម្មការស្រាវជ្រាវ និងតាមដានបុគ្គលសង្ស័យនិងណែនាំឱ្សប្រជាពលរដ្ឋដែលធ្លាប់បានទៅទីតាំងខាងលើ ដាក់ខ្លួនដាច់ដោយឡែកនិងតាមដានសុខភាពរបស់ខ្លួនរយៈពេល ១៤ថ្ងៃ តាមវិធានសុខាភិបាលរាប់ចាប់ពីថ្ងៃដែលអ្នកបានទៅទីកន្លែងនោះ នៅថ្ងៃឬក្រោយថ្ងៃអ្នកជំងឺបានទៅ។
អនុគណៈកម្មការស្រាវជ្រាវ និងតាមដានបុគ្គលសង្ស័យថាមានផ្ទុកជំងឺកូវីដ-១៩ បានអំពាវនាវដល់ប្រជាពលរដ្ឋធ្លាប់ទៅទីតាំងទាំង៥នេះ ប្រសិនបើមានអាការៈមិនស្រួលខ្លួន ឬលេចចេញរោគសញ្ញា គ្រុនក្តៅ ក្អក កណ្តាស់ ឈឺក ហៀរសំបោរ ហត់ ឬពិបាកដកដង្ហើមសូមមេត្តាប្រញាប់ទៅធ្វើតេស្តរកមេរោគកូវីដ-១៩។
ទីតាំងសម្រាប់ធ្វើតេស្ដមាននៅវិទ្យាល័យបាក់ទូក វិហារយេស៊ូ ច្រមុះជ្រូកស្ទឹងមានជ័យ (ខណ្ឌ មានជ័យ) ផ្លូវទ្រុងមាន់ (ខណ្ឌ សែនសុខ) ម៉ូឌែន៥ (ខណ្ឌ ឫស្សីកែវ) សួនការណាឌីយ៉ា (ខណ្ឌ មានជ័យ) និងមន្ទីរពេទ្យបង្អែកនៅតាមបណ្តាខេត្តនានា៕